Chandrababu Brother: చంద్రబాబు కుటుంబంలో తీవ్ర విషాదం.. సోదరుడు రామ్మూర్తి నాయుడు కన్నుమూత

ఏపీ ముఖ్యమంత్రి నారా చంద్రబాబు నాయుడు సోదరుడు, హీరో నారా రోహిత్ తండ్రి నారా రామ్మూర్తి నాయుడు కన్నుమూశారు. కొన్నిరోజులుగా అనారోగ్యంతో బాధపడుతున్న రామ్మూర్తి నాయుడు.. శనివారం మధ్యాహ్నం హైదరాబాద్‌లోని ఏఐజీ ఆస్పత్రిలో తుదిశ్వాస విడిచారు. మధ్యాహ్నం 12 గంటల 45 నిమిషాలకు ఆయన కన్నుమూసినట్లు ఆస్పత్రి వర్గాలు వెల్లడించాయి. మరోవైపు ఢిల్లీ పర్యటనలో ఉన్న సీఎం చంద్రబాబు నాయుడు సోదరుడి మరణ వార్త తెలుసుకుని.. హైదరాబాద్‌కు తిరుగుపయనం అయ్యారు. ఏపీ మంత్రి నారా లోకేష్ కూడా అమరావతి నుంచి ప్రత్యేక విమానంలో హైదరాబాద్‌కు చేరుకున్నారు. రేపు నారావారిపల్లిలో రామ్మూర్తి నాయుడు అంత్యక్రియలు నిర్వహించనున్నారు.