వర్మకు షాకిచ్చిన హైకోర్టు.. ఆ రిక్వెస్ట్ వారినే చేసుకోండని సూచన

సినీ దర్శకుడు రామ్‌గోపాల్ వర్మకు ఏపీ హైకోర్టులో చుక్కెదురైంది. వైసీపీ హయాంలో చంద్రబాబు నాయుడు, పవన్ కళ్యాణ్‌లను కించపరిచేలా పోస్టులు పెట్టారంటూ ప్రకాశం జిల్లా మద్దిపాడు స్టేషన్‌లో ఆయనపై ఇటీవల కేసు నమోదు కాగా.. విచారణకు హాజరు కావాలంటూ పోలీసులు వర్మకు నోటీసులు ఇచ్చారు. అయితే విచారణకు వెళ్తే తనను అరెస్ట్ చేసే అవకాశముందని భయపడిన ఆర్జీవీ ఏపీ హైకోర్టులో క్వాష్ పిటిషన్ దాఖలు చేశారు. దీనిపై సోమవారం విచారణ జరిపిన హైకోర్టు ఆయన వేసిన పిటిషన్‌ను డిస్మిస్ చేసింది. విచారణ సందర్భంగా ఆర్జీవీ న్యాయవాది వాదనలు వినిపిస్తూ.. పోలీసుల విచారణకు కాస్త సమయం ఇచ్చేలా ఆదేశాలు జారీచేయాలని కోర్టును కోరారు. దీనిపై న్యాయమూర్తి స్పందిస్తూ.. అలాంటి ఆదేశాల తాము ఇవ్వలేమని, అదేదో పోలీసులకే రిక్వెస్ట్ చేయాలని సూచించారు.