పవన్ కళ్యాణ్ ప్రాణాలకు తెగించారు.. మరి కెన్‌స్టార్ షిప్ మాటేంటి? పేర్ని నాని సెటైర్లు

ఏపీ డిప్యూటీ సీఎం పవన్ కళ్యాణ్ కాకినాడ పోర్టు సందర్శనపై వైసీపీ నేత, మాజీ మంత్రి పేర్ని నాని స్పందించారు. పవన్ కళ్యాణ్ ప్రాణాలకు తెగించి రేషన్ బియ్యం అక్రమ రవాణాను అడ్డుకోవడం అభినందనీయమన్నారు. తన శాఖ కాకపోయినప్పటికీ.. దోపిడీని అడ్డుకోవటానికి పవన్ కళ్యాణ్ చేసిన పనిని అభినందించాలని పేర్ని నాని అభిప్రాయపడ్డారు. అయితే పవన్ కళ్యాణ్ ప్రయత్నంలో తమకు కొన్ని అనుమానాలు ఉన్నాయని పేర్ని నాని చెప్పారు. సముద్రంలోకి వెళ్లనీయలేదని.. పోర్టు అధికారులు అనుమతి ఇవ్వలేదని పవన్ కళ్యాణ్ చెప్పారన్న పేర్ని నాని.. పవన్ కళ్యాణ్‌ను ఎవరు అడ్డుకున్నారని ప్రశ్నించారు. కస్టమ్స్ అధికారులు, పోర్టు అథారిటీ అధికారులు ఇద్దరూ పవన్ కళ్యాణ్‌తో పాటే ఉన్నారన్న పేర్ని నాని.. ఇంకెవరు పర్మి్షన్ ఇవ్వలేదని ప్రశ్నించారు. అలాగే స్టెల్లాషిప్‌ను తనిఖీ చేసిన పవన్ కల్యాణ్.. కెన్‌స్టార్ షిఫ్‌ను ఎందుకు వదిలేశారని పేర్నినాని ప్రశ్నించారు.