క్షమాపణలు చెప్పినా వదలొద్దు.. శ్రీరెడ్డికి వైఎస్ షర్మిల కౌంటర్

YS Sharmila Comments YSRCP Social Media Posts: సోషల్ మీడియాలో అసభ్యకర పోస్టులు పెట్టే వారు, అనుచితంగా దూషిస్తూ వీడియోలు చేసిన వారిని క్షమాపణలు చెప్పినా.. వదలిపెట్టకూడదని ఏపీ కాంగ్రెస్ అధ్యక్షురాలు వైఎస్ షర్మిల కోరారు. అసభ్య పోస్టులు పెట్టేవారి అరెస్టులను రాజకీయ కోణంలో కాకుండా సామాజిక కోణంలో చూడాలని ఆమె అన్నారు. పరోక్షంగా శ్రీరెడ్డి క్షమాపణలపై షర్మిల స్పందించారు. వైఎస్సార్‌సీపీ అధ్యక్షుడు వైఎస్ జగన్ నిన్న మీడియా సమావేశంలో చేసిన వ్యాఖ్యల పైనా షర్మిల స్పందించారు. వైఎస్ జగన్ అరాచకాలు భరించలేకే ప్రజలు ఎన్నికల్లో నిర్ణయాత్మకంగా వ్యవహరించి కూటమికి ఓట్లు వేశారని అన్నారు. అసెంబ్లీకి వెళ్లనప్పుడు వైసీపీకి 38 శాతం ఓట్లు వచ్చినా, కాంగ్రెస్ పార్టీకి ఒక్క శాతం ఓట్లు వచ్చినా తేడా ఏంటని షర్మిల ప్రశ్నించారు. అసెంబ్లీకి వెళ్లమనే రెఫరండంతో వైసీపీ ఎమ్మెల్యేలు రాజీనామా చేసి ఎన్నికలకు వెళ్లాలని ఆమె డిమాండ్ చేశారు. ‘మా తండ్రి వైఎస్సార్ సీఎంగా ఉన్న పార్టీ, ఆయన త్యాగం చేసిన పార్టీ, జగన్ పుట్టక ముందున్న పార్టీ కాంగ్రెస్ పార్టీ. అలాంటి పార్టీని విమర్శించే స్థాయి జగన్‌కు లేదు’ అని వైఎస్ షర్మిల అన్నారు.